Noregur vill lána...

Það kemur nákvæmlega ekkert fram í þessu svari frá Jens Stoltenberg um að Noregur muni ekki eða vilji ekki lána okkur meira eða án Icesave. Það sem hann segir er að það hefur ekki verið rætt, hvorki innan Noregs né norræns samstarfs, vísar svo til þess að það er samkomulag í gangi núþegar.

En forsendur eru breyttar. Fáum þá einmitt til að ræða það.

Senda ætti út formlega beiðni um lán sökum breyttra aðstæðna sem miða að því að Icesave verður ekki frágengið og AGS sent burt. Þannig skal athugað hvernig hugur norska stórþingsins er gagnvart þeirri hjálparbeiðni.

Einnig vona ég heitt og innilega að spunakringlur samfylkingarinnar fari að vinna þjóð sinni gagn í stað þess að samþykkja hvað sem er til að trufla ekki ESB drauminn sinn. Dragi þannig tilbaka sína spunameistara sem hafa sent sitt fjölmiðla og háskólalið á vettvanginn til að snúa öllu sér til betri vegar.

Birtir bréf Jóhönnu

Athugasemdir

[Magnús Helgi Björgvinsson, 11.10.2009 kl. 17:35]

Bíddu hvað þýðir þetta þá:

Okkur er hugleikið að aðstoða Ísland í erfiðri stöðu landsins, m.a. með veitingu langtímalána ásamt öðrum Norðurlöndum. Noregur hefur átt frumkvæði að tímanlegri og verulegri aðstoð við Ísland innan norræns ramma. Eins og þér er kunnugt er norska lánið að upphæð 480 milljónir evra (u.þ.b. 4,2 milljarðar norskra króna) af norrænu heildarláni sem nemur um 1,8 milljörðum evra. Það hefur hvorki í norsku eða norrænu samhengi verið rætt um að hækka þessar upphæðir

Og svo

Þegar Noregur, ásamt Danmörku, Finnlandi og Svíþjóð, gáfu fyrirheit um lánveitingu í nóvember í fyrra, var það m.a. með því skilyrði að Ísland virti alþjóðlegar skuldbindingar, þ.m.t. varðandi innlánstryggingar, og að þau lönd sem hafa helst orðið fyrir vanefnum íslenska innlánstryggingasjóðsins veiti lán til að fjármagna þær skuldbindingar sem íslensk stjórnvöld gangast við í þessu samhengi.

[Carl Jóhann Granz, 11.10.2009 kl. 17:38]

Nákvæmlega Magnús

Það hefur ekki verið rætt að skoða aðrar lánaleiðir. Enda segir hann ekki að slíkt sé ekki í boði.

[Arnór Baldvinsson, 11.10.2009 kl. 17:42]

Sæll Carl,

Hversvegna í ósköpunum ættu Norðmenn, eða aðrar þjóðir, að vera sólgnar í að lána óreiðumönnum og rugludöllum á Íslandi, sem hafa sýnt og sannað undanfarin tuttugu ár að þeim er ekki treystandi?  Íslendingar VERÐA að fara að skoða málin raunhæft.  Ísland rambar á barmi gjaldþrots og það að snapa lán eins og rónar hvar sem er, er ekki til framdráttar fyrir landið. 

Stoltenberg segir að það hafi ekki verið rætt í Noregi að hækka þessi lán.  Segir það ekki allt sem þarf?  Samt eru labbakútar að blaðra út og suður um að það liggi fyrir að Norðmenn vilji lána tvö þúsund milljarða.  Hvaðan kemur svona della og hver er að hagnast á þessu.  Það er það sem ég vil vita.  Hversvegna er þessum mönnum svona í mun að Norðmenn komin hingað með hendur fullar fjár, þegar Norðmenn eru greinilega ekkert voðalega áfjáðir í það að lána óreiðumönnunum á Íslandi meira?  Afskaplega hæpin rökfærsla.  Follow the money!

Kveðja,

[Carl Jóhann Granz, 11.10.2009 kl. 17:49]

Sæll Arnór
Þessir labbakútar sem þú talar um hafa bent á það að þeir hafi mætt miklum velvilja á stærra lán frá Noregi og einn ákveðinn þingmaður nefndi einhverjar tölur í því sambandi. Semsagt, ef formleg beiðni berst þá mun þingið skoða það mál vel.
Ekki er verið að tala um auknar lántökur heldur lán sem koma í stað annarra sem fylgja skilyrði sem erfitt er að gangast undir.

Ekki verið rætt segir nákvæmlega það sem stendur að það hafi ekki verið rætt. Þannig að sendum út formlega beiðni og tökum af allan vafa. Ekki ætla ég að halda því fram að líkur séu miklar en við skulum kanna það engu að síður.

Og að lokum varðandi "hversvegna í ósköpunum" Það er einfalt, Noregur var og er vinaþjóð okkar og ég trúi því heitt og innilega að þeir muni aðstoða vini í neyð alveg eins og við myndum gera fyrir þá.