Hvað gerði Davíð rangt ?

Mér finnst eins og múgæsingin sé gengin fullangt hérna.
Ég var ekkert sérstaklega hrifinn af því þegar hann var ráðinn þarna inn á sínum tíma því ég tel þetta ekki réttan stað fyrir fyrrverandi pólitíkusa, sendiherrastaða hefði verið hentugri.
Hann hafði þó reynsluna gagnvart efnahagsmálum, síðan með lögmannspróf, það ásamt því að vera með tveimur hagfræðimenntuðum aðilum með sér í stjórn.

En burtséð frá því hvað mér finnst um að hann hefði aldrei átt að fara þangað inn til að byrja með. Þá stendur eftir aðalspurningin:
Hvað er það sem hann gerði rangt ?

Mörgu hefur verið fleygt fram um hvað hann gerði rangt, ég man þó ekki eftir að hafa séð nein haldbær rök með því annað en tilfinningaleg þá.

Davíð segir ekki af sér

Athugasemdir

[Ingólfur H Þorleifsson, 8.2.2009 kl. 17:45]

Þú færð engan af hans pólitísku andstæðingum til að svara þessari spurningu þinni. Þeir hafa allt frá hruninu í byrjun október ekki getað bent á nokkurn hlut sem hann gerði rangt, og svo mun verða áfram.

Það verður gaman að sjá hvernig Jóka ætlar að snúa sig útúr þessu.

[Offari, 8.2.2009 kl. 17:49]

Davíð hefur rifið kjaft hann hefur óhikað gagnrýnt gjörðir ríkisstjórnarinar því þarf víst að þagga hann niður. Er það ekki það sem þjóðin vill?

[Carl Jóhann Granz, 8.2.2009 kl. 17:51]

Gerir þjóðin sér almennilega grein fyrir þessu öllu eða hefur stór hluti hennar tilleiðst í höndum múgæsingar ?

Ég ætla mér ekki að staðhæfa slíkt en óneitanlega finnst mér lykta af því.

[Carl Jóhann Granz, 8.2.2009 kl. 17:55]

Gunnar Þór Jónsson hefurðu þá ekki einhverjar málefnalegar ástæður fyrir því ?

[Árni Gunnarsson, 8.2.2009 kl. 18:06]

Skiptir orðspor þjóðarinnar þá engu máli í ykkar augum? Ég veit ekki betur en að þjóðir heims hafi staðið á öndinni af undrun vegna þess að ekki hafi verið skipt út þessum yfirmönnum Seðlabankans og fjármálaeftirlits ásamt ríkisstjórninni allri. Ég hef sterka hneigð til að trúa því að vinnubrögð Davíðs og Árna Math. hafi orðið okkur dýr í tengslum við hryðjuverkalagabjánaganginn hjá Brown. Og síðan spyr ég mig að því hvort Davíð sé yfirmaður stjórnsýslunnar eða Jóhanna? Hver er í vinnu hjá hverjum og hver er yfirmaður hvers? Davíð talar eins og gömul prjónakelling úr nítjándu aldar reifara um að hann viti sosum af hverju Bretar hafi sett okkur undir hryðjuverkalög, Hann muni upplýsa það þegar honum henti?

Spurning: Hvað teljið þið að Davíð hefði gert í sporum Jóhönnu? A sinni stjórnartíð rak hann menn, "hægri, vinstri" að geðþótta eftir því hvernig skapi hann var í þann og þann daginn og allur Flokkurinn öskraði; Bravó, Bravó. Hann lagði niður Þjóðhagsstofnun á góðu síðdegi af því forstjórinn talaði um tiltekið mál þannig að Davíð var ósáttur!

Þið áttið ykkur vonandi á því að menn verða að reyna að halda óskerti dómgreind þótt þeir hafi bundist stjórnmálaflokki trúarlegum vináttuböndum.

[Jónas Yngvi Ásgrímsson, 8.2.2009 kl. 18:18]

Hvað gerði hann rangt.

• Hann setti lög um einkavæðingu bankanna
• að því loknu gaf hann Landsbankann
• hann mærði útrásina
• hann setti ekki reglur eða lög okkur til varnar
• hann lækkaði innlánsskyldu bankanna
• hann hélt uppi háum stýrivöxtum
• hann sagði Englendingum að við myndum ekki standa við skuldbindingar okkar
• þess vegna voru terroristalögin sett á okkur
• hann kemur fram með fullyrðingar um að hann viti þetta og viti hitt
• þegar til kemur þá veit hann ekki neitt
• hann svarar ekki yfirmanni sínum
• hann hótaði fyrrverandi forsætisráðherra
• hann lýgur að hann hafi varað menn við ástandinu

Listinn er langur

[Árni Gunnarsson, 8.2.2009 kl. 18:20]

Ég vil bæta því við að ég taldi á fyrsta degi einboðið að öll ríkisstjórnin stigi út úr Stjórnarráðinu og faglega skipuð neyðarstjórn tæki við. Allur aðdragandi þeirra atburða sem við öll þekkjum var langur og viðvaranir streymdu til stjórnvalda úr öllum áttum langt á annað ár. Hvernig sem mál skipast á næstu mánuðum og jafnvel næstu árum mun orðspor okkar í samfélagi þjóða verða skert til óbætanlegs skaða fyrir samfélagið. Stærstur meirihluti alþingismanna er meðsekur í öllu þessu.

Ég nota að lokum orð Páls Skúlasonar f.v. Háskólarektors og segi: Landráð af gáleysi!

[Baldur Sigurðarson, 8.2.2009 kl. 18:42]

Spurt er hvað hann gerði rangt.

Til dæmis það að hann fór á fund ríkisstjórnarinnar í byrjun Apríl þegar dollarinn var kominn yfir 85kr og sagði þeim að það væri vofenglegt ástand framundan og að bankarnir gætu hrunið. Krónan væri að falla.

Samt jók hann ekki gjaldeyrisforðann. Það hefðir verið snilld á þeim tíma og hverjum manni ljóst að það þurfti að gera það á meðan gengnið var viðunandi.

Bara þetta eitt dugir mér, fyrir utan að þjóðin vill hann burt til að auka tiltrú erlendra aðila á fjármálakerfinu hér heima.

[Marinó G. Njálsson, 8.2.2009 kl. 19:33]

Það er nú búið að nefna ýmislegt, Carl, en mig langar að bæta einu við og það atriði eitt hefði átt að duga til þess að öll bankastjórnin hefði sagt af sér um miðjan október:

• Bankastjórn Seðlabankans, með Davíð Oddsson innanborðs, setti Seðlabankann á hausinn

Það virðist enginn átta sig á þeirri staðreynd.  Ég veit ekki um neinn bankastjóra á Vesturlöndum sem hefur sett bankann sinn á hausinn. Hvað þá að hann sitji sem fastast þrátt fyrir þann gjörning.

Seðlabankastjórar geta ekki skýlt sér bak við það, að bankarnir hafi hrunið.  Það er nefnilega sama skýring og eigendur Stoða, Milestone, Samson og Exista hafa ekki fengið að nota.  Þau fyrirtæki, alveg eins og Seðlabankinn, stóðu ágætlega alveg þar til eignir þeirra í bönkunum urðu að engu á þremur svörtum dögum í október. 

Seðlabankastjórarnir settu bankann á hausinn, en eigandi bankans borguðu hann út úr klípunni með því að kaupa af honum verðlitla pappíra.  Það er nefnilega allt í lagi að stjórnvöld skipti sér að bankanum, þegar allt komið í, en þau mega ekki setja út á það, að mennirnir sem settu bankann vilji að þeir stígi til hliðar.

[Carl Jóhann Granz, 8.2.2009 kl. 20:21]

Mér sjálfum þótti það heppilegast strax á sínum tíma að þeir hefðu sagt af sér og skilið sig frá þessum málum. Alveg burtséð frá því hvort þeir hafi gert eitthvað rangt eður ei.

Þeir ákváðu engu að síður að sitja áfram og hafa hingað til getað útskýrt sitt mál ágætlega. Það er alveg annað mál hversu vel ég eða aðrir svo trúa þeim rökum sem hafa komið fram.

Hér hefur verið bent á hin ýmsu atriði því til stuðnings að þeir hafi gert eitthvað rangt, en ríkisstjórnin sjálf hefur ekki bent á neitt sem þeir hafi gert rangt!
Getur það þá verið að það séu skiljanlegar ástæður á bakvið allflesta ef ekki alla sem menn hafa verið að benda á gegn þeim hér ?

Mig langar líka að benda á það að ég er ekki að réttlæta þá í að sitja áfram, einungis að velta þessu upp betur því mér hefur fundist vanta upp á rökin á bakvið það sem menn slá fram. Því eins og ég ritaði þá hefur ríkisstjórnin sjálf ekki getað sett neitt fram ennþá gegn þeim.

[Carl Jóhann Granz, 8.2.2009 kl. 20:27]

Það sem mér þykir þó gagnrýniverðast er hvernig að hlutum er staðið. Það eru flestir sammála um að það þurfi að breyta peningamálastefnunni, FME og seðlabankanum með.

Er þá ekki best að gera það skynsamlega og huga vel að hvernig það er gert frekar en að hlaupa á sig og gera eitthvað í bræði ?
Ég er mest smeykur um að þannig endum við bara í meiri vandamálum heldur en hvort Davíð sitji einhverjum vikum lengur eða ekki.

[Carl Jóhann Granz, 8.2.2009 kl. 20:30]

Traustið á genginu og Íslandi er ekki út af einum manni í seðlabankanum. Ég held nú að það sé alveg á hreinu.

Myndi nú frekar tengja traustleysið við Björgvin G. Sigurðsson að lofa upp í ermina á íslendingum með því að segjast borga Icesave þegar Geir og Ingibjörg eru að reyna að komast hjá því og koma því máli í dómsferli.
Kom nefnilega í ljós að Björgvin hafði lofað öllu fögru í samskiptum sínum við Bretana.

[Carl Jóhann Granz, 8.2.2009 kl. 21:03]

Ekki ætla ég að halda því fram að það sé traust á seðlabankanum. En ég set mikinn efa við það að traust erlendis sé seðlabankanum einum að kenna. Það er alveg á hreinu að hræringar pólitíkinnar gagnvart Bretum og ESB spilar inn í þetta traust.

Mér finnst meira atriði að nú séu gerðar skynsamlegar skipulagsbreytingar sem séu gerðar faglega og skynsamlega en ekki í einhverjum flýti eða bræði gagnvart einum manni. Ég vill sjá þetta gert skynsamlega.

Hafið yfir vafa og flokkadrætti.

[Einar Áskelsson (IP-tala skráð) 8.2.2009 kl. 22:30]

Davíð Oddsson setti ekki einn Seðlabankann á hausinn, fjarstæða. Sammála þér Carl, fólki gengur hrikalega illa að horfa hlutlaust á þetta ferli á milli Jóhönnu og Davíðs. Typical íslenskt. Niðurstaðan verður því enginn. En þetta er skák. Jóhanna á leik.